ترجمان جماعت احمدیہ محترم عامر محود کے مطابق تھانہ نوکوٹ ضلع میر پور خاص کی حدود میں فضل بھمبرو کے علاقہ میں ایک احمدی امیر حسن مرڑانی کو دو نامعلوم موٹر سائیکل سواروں نے ہدف بنا کر قتل کر دیا ہے۔ تفصیلات کے مطابق صبح نماز فجر کے بعد مقتول اپنے بیٹے کے ساتھ گھر واپس جا رہے تھے۔ وہ اپنے گھر کے قریب پہنچے تھے کہ موٹرسائیکل پر سوار دو نامعلوم افراد آئے اور ان سے نام پوچھا۔ شناخت کرنے کے بعد انہوں نے امیر حسن مرڑانی پر فائرنگ کر دی اور فرار ہو گئے۔ گولیاں مقتول کے سینے میں لگیں جس سے ان کی موقع پر ہی موت واقع ہو گئی۔

ان کی عمر چالیس سال کے قریب تھی ۔ انہوں نے پس ماندگان میں اہلیہ کے علاوہ تین بیٹیاں اور دو بیٹے سوگوار چھوڑے ہیں۔ بڑی بیٹی کی عمر 14 سال جبکہ سب سے چھوٹی بیٹی 8 ماہ کی ہے۔ امیر حسن مرڑانی ایک شریف النفس انسان تھے۔ ان کی کسی سے کوئی دشمنی نہیں تھی۔ وہ جماعت احمدیہ کے مقامی عہدیدار تھے۔ قبل ازیں ان کو احمدی ہونے کی بنا پر علاقہ میں شدید مذہبی مخالفت کا سامنا رہا۔